Madaxweynaha maamulka Galmudug Maxamed Cabdi Kaariye Qoor-Qoor ayaa daah-furay shirka wada-tashiga Dowladaha Xubnaha ka ah Dowladda Federaalka, kaas oo maanta oo Sabti ah ka furmay xarunta Madaxtooyada Galmudug ee Magaalada Dhuusamareeb.
Shirkan waxaa ka qeyb-galaya Madaxweynaha Puntland Saciid Cabdullaahi Deni, Madaxweynaha Jubaland Axmed Maxamed Islaam, Madaxweynaha Koonfur Galbeed C/casiis Xasan Laftagareen iyo Madaxweynaha Hirshabeelle Maxamed Cabdi Waare.
Madashan waxaa goob-joog ka ahaa xubno ka tirsan golayaasha Xukuumadda DXDF iyo xildhibaano heer fadaraal ah iyo bulshada rayidka.
Madaxweynaha maamulka Galmudug Maxamed Cabdi Kaariye Qoor-Qoor, ayaa sheegay in ujeedka shirka uu yahay sidii maamul-gobolleedyada dalka ay ka tashadaan hanaan doorasho, taas oo aan macnaheeda aheyn in tallada ay ku koobantahay madaxda maamul-gobolleedyada.
Madaxweynaha Hirshabeelle Maxamed Cabdi Waare, ayaa sheegay in Xaliima Yarey iyo Guddiga Doorashooyinka ay yihiin farsano, isla markaanna dhibka laga daayo, tallada annaga ayaa ka shireyna.
Madaxweyne Deni ayaa ka digey in masiirka Soomaaliyeed laga dhigo mid iska daba-wareeganaya, wuxuuna ku baaqay In marxlada kala guurka ah looga gudbo hanaan la isla ogolyahay.
Hoggaamiyaasha maamul-gobolleedyada, ayaa intooda badan khudbadahooda doorta ku saaray arrinta doorashada, waxaana shirka wajigiisa labaad la guda-galli doonaa maalinta berri.
Hassan Istiila
Hassanistiila200@gmail.com
