Ra’iisul Wasaare Xasan Cali Kheyre oo caawa shir-jaraa’iid ku qabtay magaalada Mogadishu ayaa sheegay inuu iska casilay xilkii uu hayay, isagoo sharci darro ku tilmaamay go’aankii Golaha Shacabka ee maanta ee sida degdega xilka looga qaaday.
Guddoomiyaha Golaha Shacabka Soomaaliya ee Barlamaanka Federaalka Maxamed Mursal Sh Cabdiraxmaan ayaa sheegay in baarlamaanka uu maanta kalsoonidii kala noqday Xukumaadda Ra’iisul Wasaare Xasan Cali Kheyre.
Mudane Kheyre, ayaa sheegay intii uu joogay xukunka in ay ku guuleysteen bixinta mushaarka shaqaallaha iyo ciidanka, arrimaha deyn cafinta iyo howllo kale oo muhiim u ahaa dalka Soomaaliya.
“Anigoo og wixii maanta ka dhacay Golaha Shacabka sharci darro yihiin, oo aan loo marin habraacii saxda ahaa ee xil ka qaadis xukuumadeed, anigoo og in aanay ku jirin ajandaha anigoo og in aan laga doodin, in aan laga doodin, in aanay waafaqsaneyn dastuurka iyo shuruucda dalka, hadana waxaa go’aansaday inaan umadda soomaaliyeed u noqdo tusaale oo aan iska casilo xilka Umadda Soomaaliyeed u haayay anigoo dhowraya midnimada dalka, iyo in aan dib loogu laaban burburin, qeybna aan uga noqon qalqal siyaasadeed dalka ku dhaca, mid dhaqaale, mid amni”ayuu yiri Xasan Kheyre
Xasan Cali Kheyre ayaa ahaa ra’iisul wasaarihii ugu mudada dheeraa Soomaaliya soo mara tan iyo burburkii dowladii hore ee Siyad Barre,waxaana hore u dhici jirtey in ra’iisul Wasaaraha iyo Madaxweynaha ay is khilaafaan oo xilka laga qaado.
Kheyre ayaa loo magacaabay ra’iisul Wasaare inuu ka noqdo dalka Soomaaliya 23kii Febraayo 2017.
Madaxweynaha JFS Mudane Maxamed Cabdullaahi Farmaajo ayaa wareegto Madaxweyne ugu igmaday Mudane Mahdi Maxamed Guuleed (Khadar) oo ahaa Ra’iisul Wasaare Ku-xigeenka Xukuumadda Federaalka Soomaaliya sii socodsiinta iyo maareynta howlaha Golaha Xukuumadda si kumeel gaar ah.
Wareegtada Madaxweynaha ayaa ku saleysan in aanu hakad gelin qorsheyaasha dowlad-dhiska iyo horumarinta dalkeenna tan iyo inta Madaxweynuhu uu ka soo magacaabayo Ra’iisul Wasaare soo dhisaya Xukaamad tayo leh oo sii dardargelisa xaqiijinta yididiillada shacabka Soomaaliyeed.
Hassan Istiila
Mogadishu, Somalia
