Warar 

Madaxweyne Farmaajo oo sheegay in dowladiisa ay dardar gelineyso ansixinta xeerarka iyo shuruucda la xiriira shaqaalaha

Madaxweynaha Jamhuuriyada Federaalka Mudane Maxamed Cabdullahi Farmaajo, ayaa maanta hambalyo u diray dhammaan shaqaalaha Soomaaliyeed iyo qoysaskooda meel kasta oo ay joogaan, madaama maanta ay ku beegantahay maalinta shaqaalaha adduunka.

“Shaqaalaha Soomaaliyeed waxaan uga mahad-celinaynaa sida maskax iyo muruqba ay u geliyeen dib u dhiska iyo horumarinta dalkeenna, laga soo bilaabo dadaalladii wax ku oolka ahaa iyo doorkii taariikhiga ahaa ee ay ku leeyihiin halgankii xurnimo doonka iyo aasaaskii qarannimadeenna.”

“Waxa ay maanta oo kale mudnaayeen maamuus, dabaaldegyo, kulamo lagu sharfayo iyo guddoonsiin billad shara, laakiin nasiib xumo saamaynta uu keenay caabuqa COVID-19 darteed suurtogal inooma ahan arrimahaasi. Dalkeenna maanta waxaa uu la tacaalayaa halis caafimaad oo uu sababay cudurka COVID-19, kaas oo dunida oo idil ku yeeshay saamayn xoog leh oo dhinacyada caafimaadka, dhaqaalaha iyo guud ahaan nolasha bulshada. Dhammaan caqabadaha ku xeeran dalkeenna waxa ay inagu waajibinayaan in aan laba laabno dadaalkeenna iyo waxqabadkeenna, innaga oo mideynayna muruqeenna iyo maankeenna, si aan u xaqiijinno hiigsigeenna ku aaddan dal horumarsan oo barwaaqo ah.”

“Dawladdu waxa ay xoogga saartay Ilaalinta xuquuqda iyo sharafta shaqaalaha Soomaaliyeed, annagoo mudnaanta siinay kor u qaadidda fursadaha shaqo ee dhallinyarada. Waxaan xaqiijinay inaan siinno Shaqaalaha Dowladda xuquuqdooda mushahar bil walba, taas oo aan uga golleenahay yareynta shaqo la’aanta ka jirtay dalkeenna, waana ku dadaalaynaa sidii guri kasta oo Soomaaliyeed u heli lahaa dhaqaale uu ku maareeyo noloshiisa.”

Madaxweynaha ayaa dhinaca kale sheegay si loo xoojiyo xuquuqda iyo waxqabadka shaqaalaha, in dowladiisa ay dardar gelineyso ansixinta xeerarka iyo shuruucda la xiriira Shaqaalaha, isagoo intaasi ku daray in ay xoojiyeen Iskaashatooyinka dalka, ururrada shaqaalaha iyo ururrada bulshada rayidka ah.

Hassan Istiila

Mogadishu, Somalia 

Warar kale oo la xiriira