Guddiga hirgelinta doorashooyinka heer dowlad-gobolleed ee Puntland ayaa maanta soo gabo-gabeeyay doorashada kuraasta Golaha Shacabka ee deegaan doorashadoodu tahay Puntland, kaddib markii magaalada Garowe lagu doortay lixdii kursi ee ugu dambeysay.
Kursiga Hop#073 waxaa ku guuleystay Eng Maxamed Cabdullaahi Kayse oo helay dhammaan cododkii ergada, kaddib markii uu tanaasulay musharraxii la tartamayey ee Cabdullaahi Cabdi Jaamac. Kursigan waxaa horay ugu fadhiyay Cali Axmed Jaamac Jangali.
Guddoomiyaha Gobolka Mudug ee Puntland Cabdiladiif Muuse Nuur Yare, ayaa ku guuleystay kursiga Hop#199, kaddib markii ay u tanaasushay Luul Abshir Diiriye oo la tartami laheyd. Kursigan waxaa horay ugu fadhiday Xaawo Yuusuf Axmed.
Agaasimaha Guud ee Wasaaradda Gaadiidka Puntland Cismaan Cali Yuusuf, oo helay 97 cod ayaa ku guuleystay kursiga Hop#198, kaddib markii uu tanaasulay Cabdiraxman Ciise Maxamed oo la tartami lahaa.
Sacdiyo Yaasiin Xaaji Samatar oo heshay 99 cod ayaa mar kale kusoo noqotay kursigeeda Hop#129, kaddib markii ay u tanaasushay Sacdiyo Cabdilaahi Salaad.
Kursiga shanaad ee Hop#191 waxaa ku ku guuleystay Eng Cabdixakiin Maxamed Jaamac, kaddib markii uu u tanaasulay Maxamed C/xamiid Warsame oo la tartami lahaa, waxaana Eng Cabdixakiin Maxamed Jaamac uu helay dhammaan cododka erada.
Cabdirisaaq Xasan Axmed oo helay 99 cod ayaa ku guuleystay kursiga Hop#221, kaddib markii uu u tanaasulay Cali Maxamed Axmed.
Madaxweynaha Puntland Siciid Cabdullahi Deni, ayaa u hambalyeeyay dhammaan xildhibaanada cusub ee Puntland ku metelaya Golaha Shacabka JFS, oo maanta doorashadoodu soo dhammaatay.
“Illaahay ayaa mahad leh oo inoo suuragaliyey in wax walbo siwanaagsan inoogu qabsoomeen”
“Waxaan alle uga baryayaa Xildhibaanada cusub in uu u fududeeyo masuuliyadda loo doortay, waxaan u mahadcelinayaa Guddiga Doorashooyinka heer Federaal iyo heer Puntland, Ciidamada Amniga, Hoggaanka dhaqanka, Bulshada Rayidka ah, kor joogtada, Warbaahinta iyo cidkasta oo doorkeeda qaadatay” ayuu yiri Deni.
