Baarlamaanka dowlad-gobolleedka Galmudug ayaa maanta muddo-xileedka hay’addaha dowaldda ka dhigay shan sano, taas oo hal sano ku kordhineysa muddo-xileedka Madaxweyne Axmed Qoor-Qoor.
Xildhibaannada baarlamaanka ayaa wax-ka-beddel ku sameeynayo qodobada dastuurka ee kala ah 32, 42, 49 iyo 54, kaddib markii 29 xildhibaan ay mooshin wax-ka-beddel loogu sameynayo qodobadaasi ay u gudbiyeen guddoonka baarlamaanka.
Golaha baarlamaanka ayaa ugu dambeyn cod aqlabiyad leh ku ansixiyay in hay’addaha dastuuriga Galmudug muddo xileedkoodu noqdo 5 sano, halka markii hore uu ahaa afar sano.
Madaxweyne Qoorqoor ayaa ku biiraya madaxweynayaasha Koonfur-Galbeed, Hirshabeelle iyo Jubbaland, kuwaas oo min hal sano ku kororsaday muddo xilleedkooda, kaddib markii baarlamaannada maamullada ay wax-ka-beddeleen qodobada qaar ee dastuurka.
Dowladda Federaalka ilaa iyo hadda ma aysan caddeynin mowqifkeeda ku aadan muddo korarsiga madaxweynayaasha dowlad-gobolleedyada sameeyeen, sidoo kale lama ogga doodihii shirka Madasha Wadatashiga Qaran ee todobaadkan lagu qabtay magaalada Muqdisho in ay kamid ahaayeen muddo kordhinta madaxda.
Siyaasiyiin iyo xildhibaanno kasoo jeeda maamul-gobolleedyada ayaa dowladda Federaalka ku cadaadinayaan inay sharci darro ku tilmaamto go’aannada baarlamaan-gobolleedyada.
Hassan Istiila
Mogadishu, Somalia
