(KALFADHI) – Cabdullaahi Maxamed Cali Raage, oo ku magac dheer (Sanbaloolshe), waa xildhibaan ka tirsan Golaha Shacabka ee Baarlamaanka Federaalka ah ee Soomaaliya. Waxa uu ku dhashay gobolka Hiiraan ee bartamaha Soomaaliya, gaar ahaan magaalada Buulaburte taariikhdu markii ay ahayd 27, Luulyo 1968.
Sooyaalkiisa Siyaasadda
Sanbaloolshe, waa siyaasi ruugcaddaa ah, diblumaasi iyo xeel-dheere dhanka amniga ah oo caan ka ah Soomaaliya. Waxa uu leeyahay sooyaal siyaasadeed oo dhirirsan muddo labaatan sano ah. Tobankii sano ee ugu dambeysay waxa uu ka mid ahaa siyaasiyiinta ugu firfircoon koonfurta iyo bartamaha Soomaaliya.
Xilalka uu soo qabtay
Waxa uu soo qabtay xilal kala duwan oo isugu jira wasiir, danjire, taliye sirdoon, iyo haatan oo uu yahay xildhibaan federal, kuna fadhiya kursiga uu tirsigiisu yahay HOP#058 ee deegaan doorashadiisu tahay maamul goboleedka Hirshabeelle.
Wuxuu soo noqday Wasiirka Amniga Qaranka ee Dowladdii kumeel-gaarka ahayd sanadkii 2009, xilli Soomaaliya ay ragaadiyeen dhibaatooyin dhanka ammaanka ah. Mar kale ayuu noqday wasiirka lacagta sanadkii 2010. Sidoo kale, waxaa tiro labo jeer ah loo magacaabay Taliyaha Hay’adda Nabad-sugidda iyo Sirdoonka Qaranka (NISA) sanadihii 2014 iyo 2017. Waxa uu sidoo kale soo noqday Danjiraha Soomaaliya u fadhiya dalalka Ingiriiska sanadkii 2013 iyo Turkiga oo uu safiir ka ahaa sanadkii 2015.
Si kastaba ha ahaatee, kaddib dib u doorashadii madaxweyne Xasan Sheekh Maxamuud, Sanbaloolshe waxa uu ka mid ahaa xildhibaannada safka hore uga jira dagaalka Al-Shabaab isaga oo ka qaatay kaalin abaabul, qorsheyn iyo hagidda dadka deegaanka. Waa siyaasi aad looga qaddariyo deegaan-doorashadiisa iyo guud ahaan fagaareyaasha siyaasadda ee Soomaaliya.
Waxa uu caan ku yahay oraahdiisa qayaxan, xirfaddiisa kicinta dadweynaha, galaangal siyaasadeed iyo hal-adeygiisa mawaaqifta siyaasadeed ee uu u istaagayo.
Xildhibaan Cabdullaahi Sanbaloolshe waa xubin ka mid ah Golaha Fulinta ee Xisbiga Midowga Nabadda iyo Horumarka (UPD) ee uu hoggaamiyo madaxweynaha xilligan talada haya ee Soomaaliya Dr. Xasan Sheekh Maxamuud. Sidoo kale, waa Xoghayaha Arrimaha Gudaha iyo Amniga ee xisbiga.
