Wafdi ka socday qaar kamid ah saaxiibada Soomaaliya ee beesha caalamka ayaa shalay magaalada Baydhabo kulan kula qaatay Madaxweyne Cabdicasiis Xasan Maxamed Laftagareen.
Kulanka ayaa diirrada lagu saaray arrimo kala duwan oo la xiriira siyaasadda, bini’aadantinimada iyo dadaallada horumarka maamulka Koonfur Galbeed iyo guud ahaan Soomaaliya.
Wakiilka gaarka ah ee Qaramada Midoobey u qaabbilsan Soomaaliya James Swan oo saxaafadda kula hadlay magaalada Baydhabo, ayaa sheegay in beesha caalamka ay soo dhoweynayaan dhismaha golaha deegaanka degmada Xudur oo dhowaan la soo gabo-gabeeyey, iyagoona rajeeyay in ay tusaale u noqoto dadaallada kale ee golayaasha degmooyinka.
Dhinaca kale wuxuu sheegay in ay soo dhoweynayaan dadaallada joogtada ah ee maamulka Koonfur Galbeed uu ku xoojinayo maamulka deegaanka. Wafdiga ayaa carrabka ku adkeeyay muhiimadda ay leedahay in la xaqiijiyo in dadka la siiyo saaxad ay si xor ah ugu cabiri karaan waxay doonaan, oo ay ku jirto xorriyadda isu imaatinka, abaabulka, iyo warbaahinta, iyadoo dadka reer Koonfur Galbeed ay ka doodayaan arrimaha muhiimka ah ee ajandaha guud.
“Marka la eego xaaladda guud, xiriirka shaqo ee adag oo wax tar leh ee dhexmara Dowladda Federaalka Soomaaliya iyo maamulada ka jira Dowlad Goboleedyada xubnaha ka ah Federaalka ayaa lagama maarmaan u ah xasilloonida muddada dheer iyo baraarada mustaqbalka dhammaan dadka Soomaaliyeed”
“Arrintan awgeed, waxaan mar kale ku celinay baaqeenii ku aaddanaa xiriir wada shaqayn ee dhexmara Dowlad Goboleedka Koonfur Galbeed iyo Dowladda Federaalka, waxaana soo dhoweyneynaa ka qeybgalka Madaxweynaha ee shirka Golaha Wadatashiga Qaran ee dhowaan lagu soo gabagabeeyay magaalada Muqdisho,”, ayuu sii raaciyay.
Isku-duwaha Arrimaha Bini’aadannimada ee Qaramada Midoobay, Martin Griffiths, ahna guddoomiyaha IASC, ayaa horraantii bishan sheegay in labo deegaan oo ku yaalla Koonfur-Galbeed ay geli doonaan xaalad macluul ah dhammaanka sannadkan haddii xaaladda abaaraha ay sidan sii ahaato.
Malaayiin qof oo ku nool Soomaaliya ayaa wajahaya dhibaatooyin iyo heerar cunto yari ah oo degdeg ah, iyadoo loo baahanyahay gargaar degdeg ah oo sare loogu qaadayo ka jawaabida xaaladaha bini’aadantinimo ee sii xumaanaya iyo baahiyaha sii kordhaya, ayuu sii raaciyay Martin.
Saaxiibada Soomaaliya ee beesha caalamka ayaa hoosta ka xariiqay in ay si weyn uga walaacsanyihiin xaaladda adag ee bini’aadantinimada ee saameysay dadka degan Koonfur Galbeed iyo kuwa kusoo barakacay. Beesha caalamka ayaa sheegay in ay ka go’antahay in ay wadaan taageerada Dowlad Goboleedka Koonfur Galbeed oo wajahaya caqabaddan baaxadda leh.
Hassan Istiila
Mogadishu, Somalia
