Golaha guurtida Somaliland ayaa shalay dib golaha wakiillada ugu celiyay xeerka guud ee doorashooyinka iyo xeerka nidaamka urrurada iyo axsaabta siyaasada.
Labada xeer ee kala ah Xeer Lr 91/2022 iyo Xeer Lr 14/2011, ayaa golaha guurtida loo gudbiyay 20-ka bishan September, kaddib markii wax-ka-beddel iyo kaabis ay ku sameeyeen golaha wakiillada.
Golaha Guurtida ayaa dib-u-celinta labada xeer ku sababeeyay in 46 xildhibaan oo ka tirsan golaha wakiillada ay cabasho kasoo gudbiyeen wax-ka-beddelka xeerka doorashooyinka.
Xildhibaannada wax-ka-beddalka kasoo horjeeda oo sheegay in ay yihiin aqlabiyada golaha wakiilada, ayaa ku dooday in ansixinta wax-ka-beddalka xeerarkan aan la waafajin xeer hoosaadka golaha, isla markaana kooramka golaha oo aan buuxin duuduub lagu ansixiyay.
“Markaanu la tashanay garyaqaanka golaha ayaan go’aansanay in wax-ka-beddalkan khilaafku ka taaganyahay aan la horkeenin golaha dibna loogu soo celiyo golihii wakiillada,” ayaa lagu yiri war-saxaafadeed kasoo baxay golaha guurtida.
Doorashooyinka Somaliland oo dib-u-dhacay
Guddida Doorashooyinka Somaliland ayaa maalin ka hor ku dhawaaqay in doorashada madaxweynaha aysan dhici karin bisha Novermber ee sannadkan.
Guddida ayaa war-saxaafadeed ay soo saareen ku sheegay in aysan heynin dhaqaalo ku filan, islamarkaana ay jiraan arrimo farsamo oo u baahan in la xaliyo ka hor doorashada.
Guddiga doorashada ayaa dalbaday muddo sagaal bilood ah oo ka bilaabaneysay bisha October si ay u diyaariyaan qarashka doorashada iyo howlaha farsamada oo ay ku jiraan diwaangalinta codbixiyayaashu.
Golaha wakiillada ee Somaliland ayaa todobaadkii hore ansixiyay wax-ka-beddelka xeerka doorashooyinka, kaas oo oggolaanaya in doorashada madaxtooyada iyo furista ururrada ay dhacaan isku mar.
Xisbiyada mucaaradka ayaa caddeeyay mowqifkooda dib-u-dhaca doorashada
Guddoomiyaha xisbiga Wadani Xirsi Cali Xaaji Xasan, musharraxa madaxweynaha ee xisbiga Cabdiraxmaan Maxamed Cabdillaahi Cirro iyo xubno ka tirsan xisbiga, ayaa sheegay in aysan oggolaan doonin muddo kordhin loo sameeyo madaxweynaha Somaliland oo aan xisbigooda laga talo galin.
“Go’aanka xisbiga ayaa ah in uusan oggolanin muddo kordhin 13 Novermber ka danbaysa oo aan laysku waafaqsanayn, oo aan laga heshiin,” ayuu yiri guddoomiye Xirsi.
Hassan Istiila
Mogadishu, Somalia
