Dowladda Federaalka Soomaaliya ayaa diyaarineysa qorshe lagu dar-dargelinayo la-dagaallanka kooxda al Shabaab, iyadoo deegaanno badan oo ka tirsan gobollada Hiiraan iyo Galgaduud ay ka bilowdeen kacdoon ka dhan ah kooxda.
Falanqeyayaasha arrimaha amniga ayaa hoosta ka xariiqaya isku xirnaanshaha amniga iyo siyaasadda Soomaaliya inay wiiqeyso la-dagaallanka al Shabaab.
Madaxda dowladihii Federaalka ayaa wakhti badan kaga lumay isku heynta shanta dowlad-gobolleed, inkasta oo iyagana ay tabasho ka sheegtaan dowladda dhexe.
Agaasimaha Machadka Hiraal, Samira Gaid, oo todobaadkan ka qeyb-galeysay taxanaha 13aad ee MIND oo loogu hadlayay amniga dalka, ayaa soo jeedisay in la kala saaro siyaasadda iyo amniga si wada-shaqeynta amniga ay u jirto mar walba.
“Tusaale, haddii qof uusan ku faraxsaneyn siyaasadda markaa socota, wuxuu dhibaato u keenayaa amniga. Wuxuu joojinayaan wada-shaqeyntii laga rabay, mararka qaar xiriirka ayuu jarayaan,” Waxaa ay intaa raacisay in hoggaanka dalka uu ka maqanyahay sidii loo mideyn lahaa la-dagallaanka kooxda al Shabaab.
“Waxaa laga hadlaa in kooxda loo wajaho hab militeri, in la abaabulo qabiillada iyo in dhaqaallaha ahaan loola dagaallamo. Intaasi oo dhan waxaa ay kamid yihiin istaraatiijiyad guud, laakiin waxaa loo baahanyahay in istaraatiijiyadaasi la qeexo, kaddibna la fahamsiiyo dadka, lana abaabulo shacabka si ay ugu jeestaan dagaalka al Shabaab,” ayey tiri.
‘Hadda waxaa maqan in qorshaha iyo fikirkaas la isku keeno,” ayey sii raacisay.
Hassan Istiila
Mogadishu, Somalia
