Xildhibaan Maxamed Mursal Boorow oo ka tirsanaa Golaha Shacabka ee baarlamaanka Soomaaliya, ayaa xalay ku geeryooday magaalada Muqdishu, kaddib muddo uu xanuunsanaa.
Madaxweynaha Jamhuuriyadda Federaalka Soomaaliya Xasan Sheekh Maxamuud iyo guddoomiyaha Golaha Shacabka Sheekh Aadan Maxamed Nuur Madoobe, ayaa ka tacsiyadeeyay geerida xildhibaanka.
Madaxweyne Xasan Sheekh ayaa sheegay in marxuumka uu muddo dheer u soo adeegayey Qaranka Soomaaliyeed.
“Innaa Lilaahi Wa Innaa Ilayhi Raajicuun. Waxaan u tacsiyaynayaa qoyskii, qaraabadii iyo guud ahaan ummadda Soomaaliyeed ee uu ka geeriyooday Marxuum Maxamed Mursal Boorow,” ayuu yiri madaxweynaha.
Dhinaca kale guddoomiyaha Golaha Shacabka ayaa yiri “Waxaan murugada iyo xanuunka la qaybsanayaa qoyska, ehelada iyo dhammaan ummadda Soomaaliyeed geerida ku timid Alle ha u naxariistee Xildhibaan Maxamed Mursal Boorow.”
Xildhibaan Boorow, ayaa kamid ahaa xildhibaannadii laga soo doortay deegaannada maamulka Koonfur-Galbeed, waxuu bishii September ee sannadkii 2018 ku dhaawacmay qarax loogu xiray gaarigiisa balse wuu ka caafimaaday dhaawicii kasoo gaaray qaraxaasi.
Hassan Istiila
Mogadishu, Somalia
